Një 38-vjeçar është vënë në pranga në Vlorë, pasi rezultonte person në kërkim ndërkombëtar nga autoritetet italiane.
Adjol Kushtaj ishte shpallur në kërkim nga Italia, ku është dënuar me 10 vite burg nga Gjykata e Apelit në Firence. Ai akuzohet për kultivim të kanabisit, prodhim dhe mbajtje të lëndëve narkotike, si dhe trafik droge në bashkëpunim me persona të tjerë.
Arrestimi i tij është bërë në kuadër të bashkëpunimit ndërkombëtar të forcave të rendit. Kushtaj është ndaluar në mënyrë të përkohshme dhe pritet të ekstradohet drejt Italisë për të vuajtur dënimin.
Njoftimi i Policisë:
Finalizohet operacioni policor i koduar “Ombra”, për kapjen e një shtetasi të shpallur në kërkim ndërkombëtar, për llogari të Italisë.
I dënuar nga autoritetet italiane me 10 vite burgim, për veprimtari kriminale në fushën e narkotikëve, lokalizohet dhe vihet në pranga 38-vjeçari, i shpallur në kërkim ndërkombëtar, me qëllim ekstradimi drejt Italisë.
Seksioni për Hetimin e Narkotikëve, në bashkëpunim me Seksionin Operacional në DVP Vlorë, në vijim të punës për lokalizimin dhe kapjen e shtetasve të shpallur në kërkim ndërkombëtar, bazuar në informacionet e siguruara si dhe në bashkëpunim me zyrat homologe të Interpolit, organizuan dhe finalizuan operacionin policor të koduar “Ombra”.
Si rezultat, në lagjen “Kushtrimi”, u bë kapja dhe arrestimi provizor, me qëllim ekstradimi drejt Italisë, i shtetasit:
* Adjol Kushtaj, 38 vjeç, banues në Vlorë.
Ky shtetas ishte i shpallur në kërkim ndërkombëtar, pasi Gjykata e Apelit Firence, Itali, me vendimin e datës 23.11.2023, e ka dënuar me 10 vite burgim, për veprat penale “Kultivim i bimëve narkotike”, “Prodhim, mbajtje dhe shitje e lëndëve narkotike”, “Trafikim i narkotikëve” dhe “Krim i kryer në bashkëpunim”, sipas Legjislacionit Penal Italian dhe Ligjit për Narkotikët.
Interpol Tirana dhe Interpol Roma vijojnë bashkëpunimin për procedurat e mëtejshme të ekstradimit.
