Agron Gjekmarkaj, nënkryetari i Partisë Demokratike dhe nënkryetari i Kuvendit të Shqipërisë ka dhënë dorëheqje nga funksionet partiake, pas humbjes së PD-së në zgjedhjet e pjesshme vendore të 6 marsit në gjashtë bashki të vendit.
Gjekmarkaj është shprehur gjatë mbledhjes me dyer të mbyllura në Grupin Parlamentar të PD-së se, ai do të qëndrojë vetëm në funksionin e deputetit të thjeshtë, ndërkohë që deklaroi se do të heqë dorë nga posti i nënkryetarit të PD-së dhe nga posti i nënkryetarit të Kuvendit.
“PD është në gjendjen të keqe, rrezikojmë të shuhemi. Kam ndjerë përbuzje! Do mbetem deputeti i thjeshtë”, mësohet të ketë thënë Gjekmarkaj gjatë mbledhjes së PD-së.
Agron Gjekmarkaj detyrën e nënkryetarit të PD-së e mori në muajin janar, duke qenë një katër nënkryetarët së bashku edhe me Enkelelejd Alibejan, Jorida Tabaku dhe Grida Dumën. Si nënkryetar i Kuvendit ai zëvendësoi Enkelejd Alibeaj, me këtë të fundit që mori detyrën e kreut të Grupit të PD-së, pas dorëheqejs së Alfred Rushajt.
Gjekmarkaj u votua në mbledhjen e Këshillit Kombëtar të 15 janarit, ndërkohë që sot më 7 mars ai dha dorëheqjen nga funksionet që iu besuan vetëm dy muaj më parë.
Më herët, përmes një mesazhi në Facebook, Gjekmarkaj ka pranuar humbjen e PD-së në zgjedhjet e pjesshme lokale. Ai tha se ishte një humbje tronditëse.
REAGIMI I GJEKMARKAJT
Në zgjedhjet e pjesshme të 6 Marsit, Partia Demokratike pësoi një humbje tronditëse duke tejkaluar çdo parashikim ogurzi.
Përtej çdo rrethane kunder nesh, sado të dukshme e turpëruese, ne nuk mund të akuzojmë askënd pos vetes. Çdo justifikim është i papranueshem!
PD duhet të mbledhe sonte me urgjencë organet e saj dhe të nxjerre përgjegjësitë që çuan në këtë katastrofë elektorale.
Unë, prej dy muajsh jam njëri prej katër Nënkryetarve të PD-së dhe jam i gatshëm të mbaj pergjegjësinë time.
Nuk do t’i shmangem asaj per asnjë arsye apo interes që bie në kundershtim me vullnetin e shoqerisë dhe parimet e mia etike.
