Një aksident me pasojë vdekjen u regjistrua dje në Vlorë, mirëpo nga hetimet rezultoi se autore nuk ishte gruaja K. Gj., 44 vjeçe, por bashkëshorti i saj. Policia bën me dije se pas verifikimeve të kryera, rezultoi se në momentin e aksidentit, makina tip “Ford” drejtohej nga bashkëshorti M. Gj. dhe jo gruaja e tij, siç deklaruan në fillim.
Si pasojë e përplasjes, gjeti vdekjen Rr. V., 73 vjeç.
“Specialistët e Qarkullimit Rrugor të DVP Vlorë, në vijim të veprimeve hetimore për zbardhjen e rrethanave të aksidentit me pasojë vdekjen, të ndodhur ditën e djeshme, në aksin rrugor “Fier-Vlorë”, arrestuan në flagrancë shtetasin M. Gj., 53 vjeç, banues në Vlorë.
Nga këqyrja e pamjeve filmike ka rezultuar se në kohën që është aksidentuar me pasojë vdekjen shtetasi Rr. V., 73 vjeç, automjeti tip “Ford” drejtohej nga shtetasi M. Gj. dhe jo nga bashkëshortja e tij, siç ata deklaruan fillimisht”, thuhet në njoftimin e policisë.
Specialistët e Qarkullimit Rrugor të Komisariatit të Policisë Sarandë arrestuan në flagrancë shtetasin A. G., 34 vjeç, banues në Gjirokastër, pasi ditën e djeshme, duke drejtuar automjetin tip “Benz” është përplasur me një motoçiklet me drejtues shtetasi R. B., 20 vjeç, i cili si pasojë ka ngelur i dëmtuar dhe ndodhet në spital, nën kujdesin e mjekëve. Materialet iu referuan Prokurorisë, për veprime të mëtejshme.
