Djali i Azem Hajdarit liderit të Lëvizjes Studentore ka deklaruar se e ka për nder emrin që mban, pasi ky është amaneti që i është lënë. Në një intervistë për ABC News, ai ka treguar ndër se mban gjithmonë me vete një unazë që i përket të atit. ‘Unë nuk e kam njohur babain tim por në jetën time ai është shembulli, frymëzimi, motivuesi i madh shpirtëror dhe mbajtja me nder e emrit të tij është amaneti që më është lënë’, u shpreh Hajdari.
Më tej, i vogli i familjes Hajdari ka theksuar se për t’u bërë pjesë e politikës nuk ka nevojë për një ftesë, por që do t’ia lërë kohës. ‘Angazhimi dhe kontributi im në politikë është një çështje e lënë kohës së duhur për të cilën nuk e shoh të nevojshme një ftesë’, shtoi ai. Gjithashtu Hajdari ka thënë se është pro qendrimeve të motrës, Rudina Hajdari, pasi djegia e mandateve nuk ishte një zgjedhje e mirë. ‘Jam pro çdo qendrimi idealist që nuk ndjek vendime rrufe të kryetarit të partisë, por interesin e sovranit. Djegia e mandatit nuk besoj se ishte zgjidhje e mirë dhe koha po e vërteton’, ka përfunduar Azem Hajdari.
