Aplikimet për të regjistruar fëmijët pranë çerdheve apo kopshteve publike në Tiranë për vitin 2020-2021 do të nisin në datën 22 qershor. Drejtoria e Përgjithshme e Çerdheve dhe Kopshteve ka njoftuar nisjen e regjistrimeve nga kjo datë deri më 26 qershor si dhe ka bërë të ditur procedurën që do të kryhet për regjistrimin e fëmijëve pranë këtyre institucioneve publike.
Kriteri i parë është që prindi duhet të aplikojë ne kopshtin që i takon në njësinë administrative, certifikata e fëmijës me certifikatë familjare, plotësohet një formular kontakti dhe formular i punës. Vërtetimi që prindi është në marrëdhënie pune është i rëndësishëm pas u jepet prioritet atyre fëmijëve që i kanë prindërit në punë, duke parë edhe numrin e madh të fëmijëve në çerdhe dhe kopshtet publike.
Drejtoria e Përgjithshme e Çerdheve dhe Kopshteve ka bërë të ditur kriteret dhe dokumentacionin e duhur për aplikuesit që vijnë nga shtresat social-ekonomike në nevojë të cilat i janë referuar kategorive vunerabël sipas VKB-së Nr. 128 datë 26.12.2019 “Për miratimin sistemimin e taksave dhe tarifave vendore në qytetin e Tiranës.
Fëmijë me statusin e jetimit: libreza e statusit të jetimit të fëmijës, certifikata personale dhe familjare. Fëmijë të familjeve ku kujdestari ligjor ka statusin e jetimit: librezë e statusit kujdestar ligjor të fëmijës, certifikatë personale dhe familjare e fëmijës.
Fëmijë me aftësi të kufizuara mendore dhe fizike dhe me sëmundje të renda sipas raporti mjeko-ligjor: raport mjeko-ligjor i fëmijës, certifikatë personale dhe familjare e fëmijës. Fëmijë ku kujdestari ligjor është me aftësi të kufizuara mendore dhe fizike dhe me sëmundje të rënda, sipas raportit të komisionit mjeko-ligjor: raport mjeko-ligjor i kujdestarit ligjor të fëmijës, certifikatë personale dhe familjare e fëmijës.
