“Unë jam njeri që s’vij rishtas në politikë, por që i kam ngjitur shkallët një e nga një, në funksion të njëjtit objektiv: Shërbestar për Vlorën, pasionant e tifoz i saj. I dashuruar me qytetin tonë, me të gjitha karakteristikat e qytetarëve tanë, me çdo cep të Vlorës sonë ku ne u rritëm.
I gjendur shpesh përballë dilemave vendimi im mbetet ai: TË KONTRIBUOJ!”, – tha gjatë një bisede në studio kandidati për deputet i Bindjes Demokratike për Vlorën, Ardi Kollozi, mbrëmjen e djeshme, në një trasmetim të drejtëpërdrejtë në Rtv Real, Vlora News e Saranda web. Ndërsa vijoi se: “Nuk ka mënyrë më të mirë se sa ai të grumbullohesh, të aderosh në një grup politik ku zëri jot dëgjohet. Ku projektet, kërkesat, idetë e tua mund t’i imponosh, t’i tjetërsosh, t’i transferosh e t’i transformosh në ligje e projekte që implementohen.
Kjo është rruga miqtë e mi, ndaj unë jam sërish në garë: Për Vlorën, për çdo vlonjat e për të ardhmen tonë.” Gjatë bisedës rreth 90 minuta për ballë gazetarit Harilla Koci, Ardi Kollozi foli për projektet e parimet e Bindjes Demokratike, ndërsa u ndal gjatë te fakti se kjo është e vetmja forcë, e cila garon me lista 100% të hapura, duke i dhënë mundësinë reale cdo kandidati të saj për të qenë pjesë e parlamentit shqiptar pas 25 prillit.
Sipas Kollozit, kandidatët e Bindjes, janë ekipi i duhur, pasi ata janë pasqyrë e vlonjatëve e Sarandiotëve, e banorëve të mbarë qarkut, pasi përfaqësojnë të njëjtat vlera.
Sipas tij, gjithë këta të rinj, por edhe të tjerë kandidatë me background e eksperiencë politike, kanë qëllimin e vetëm të japin shembullin e duhur për politikën shqiptare, e të përcaktojnë ndryshimin në perceptimin dhe punën e saj në të ardhmen. Nën këtë këndvështrimin, por edhe për besimin që po marrin cdo ditë në terren Ardi Kollozi u shpreh i bindur se kjo forcë politike do të jëtë përfaqësuese pas 25 prillit, e se mandati i Vlorës është i padiskutuar.
