Shqiptari është arrestuar nga karabinierët në Itali, pasi jo vetëm është kapur në flagrancë për grabitje si pjesë e një bandë ‘skifterësh’, por iu gjet edhe një armë pistoletë “Glock” e mbushur dhe gati për qitje.
I arrestuari është identifikuar si Kristian Caka, 26 vjeç, me precedentë të mëparshëm penalë. Autoritetet thanë se arma ishte gjysmëautomatike, kurse aktiviteti kriminal kryhej kryesisht në zonën e Romës.
I dyshuari ishte duke udhëtuar përgjatë Corso Casale me një mjet “Fiat Panda”, së bashku me një person tjetër brenda. Ata po kryenin lëvizje të dyshimta, që ngacmoi karabinierët.
Oficerët vendosën më pas të ndërhynin dhe të ndalonin automjetin. Pasagjerët, sapo kuptuan se karabinierët po përpiqeshin t’i kontrollonin, braktisën makinën dhe ikën me vrap.
Pas ndjekjes ata kapën një nga të rinjtë, që ishte pikërisht shqiptari dhe gjatë kontrollit i gjetën armën “Glock”, të kalibrit 45, brenda në çantën e tij marsup, me një karikator të futur dhe 13 fishekë brenda. Gjithashtu edhe dy byzylykë, tre unaza ari të zbukuruara me gurë të çmuar dhe një unazë argjendi, të vjedhura nëpër banesa.
Një kontroll i mëvonshëm i makinës së braktisur në mes të rrugës, i çoi oficerët në gjetjen e katër orëve nga marka të njohura. I shoqëruar në stacionin e policisë, i riu u identifikua si Kristian Caka, 26 vjeç, pa adresë të caktuar.
Sipas rekordeve kriminale, nga një hajdut udhëtarësh, ai kishte ardhur në Asti për të kryer disa grabitje të përsëritura. Shqiptari nuk zbuloi identitetin e bashkëpunëtorit të tij, i cili arriti të arratisej. I riu u arrestua për posedim të paligjshëm të një arme zjarri dhe marrje të mallrave të vjedhura.
Hetimet e mëvonshme zbuluan se arma ishte vjedhur nga një shtëpi në Rimini qershorin e kaluar, informon “La Stampa”.
“Hetimet janë duke u zhvilluar”, raportojnë karabinierët, “për të identifikuar pronarët e bizhuterive dhe orëve të gjetura, të cilat padyshim ishin vjedhur në kryeqytet ose në zonat përreth”.
