Pas më shumë se 18 vjet luftë, amerikanët dhe Talibanët nënshkruan marrëveshjen e paqes. Nëse Talibanët do t’u përmbahen zotimeve të marrëveshjes, trupat amerikane dhe ato të NATO-s do të tërhiqen nga Afganistani brenda 14 muajve. Sekretari amerikan i Shtetit Mike Pompeo tha se arritja e paqes kërkon punë e sakrificë nga të gjitha palët.
Shtetet e Bashkuara dhe NATO-ja do të tërhiqen nga Afganistani brenda 14 muajve, nëse Talibanët do t’u përmbahen zotimeve të bëra në marrëveshjen e nënshkruar mes palëve në Doha. Dokumenti u nënshkrua nga i dërguari amerikan Zalmay Khalilzad dhe shefi politik i Talibanëve Mullah Abdul Ghani Baradar, me synimin për t’i dhënë fund luftës mbi 18-vjeçare.
Sekretari amerikan i Shtetit Mike Pompeo dhe krerët e Talibanëve morën pjesë në ceremoninë e nënshkrimit, ndërkohë në vazhdim priten bisedime midis qeverisë afgane dhe Talibanëve.
Militantët ranë dakord të e mos lejojnë al-Kaedën ose ndonjë grup tjetër ekstremist të veprojë në zonat e kontrolluara prej tyre.
“Arritja e paqes do të kërkojë punë dhe sakrificë nga të gjitha palët. Shtetet e Bashkuara, aleatët, qeveria afgane, udhëheqësit e Talibanëve dhe mbi të gjitha populli afgan duhet të rruajnë vrullin e tanishëm për të pasur një paqe të qëndrueshme,” tha sekretari i Shtetit Mike Pompeo.
Për Talibanët, shefi politik Mullah Abdul Ghani Baradar, tha se Emirati Islamik i Afganistanit është i përkushtuar për zbatimin e marrëveshjes dhe për një qasje pozitive me Uashingtonin.
Shoqëria në Afganistan druan se tërheqja e amerikanëve do të risjellë në pushtet Taibanët, por kreu i tyre Hibatullah Akhundzada tha se si meshkujve ashtu dhe femrave duhet t’u jepen të drejtat e duhura, duke shmangur fjalën të barabarta.
ShBA-ja e pushtoi Afganistanin disa javë pas sulmeve të 11 shtatorit 2001. Mbi 2,400 ushtarë amerikanë janë vrarë gjatë konfliktit, ndërsa ndodhen të dislokuara në këtë vend rreth 12,000 trupa.
Fundi i luftës në Afganistan ishte një prej premtimeve të presidentit Donald Trump gjatë fushatës së tij zgjedhore të vitit 2016 dhe duhet se arritja e marrëveshjes me Talibanët do t’i shërbejë atij si kalë beteje për të kërkuar një mandat të dytë.
