Organizata Botërore e Shëndetësisë ka reaguar në lidhje me lajmet e rreme për Shqipërinë, por edhe masat që ajo ka marrë për parandalimin e koronavirusit.
Përmes një reagimi zyrtar, zyra e OBSH-së informon se “Organizata Botërore e Shëndetësisë po punon ngushtë me Ministria e Shëndetësisë dhe Mbrojtjes Sociale për të përballuar sfidat që koronavirusi COVID-19 paraqet për vendet e Rajonit Europian. Në këtë kontekst, është e një rëndësie të veçantë të theksohen kapacitetet në Shqipëri përsa i përket zbulimit, diagnostikimit dhe trajtimit të rasteve të mundshme.
Vigjilenca e shtuar është veçanërisht e rëndësishme për vendet e Nën-rajonit të Ballkanit Perëndimor, si Shqipëria, Serbia dhe Mali i Zi, të cilat nuk kanë ende asnjë rast të COVID-19, duke qenë të vetëdijshëm se asnjë vend nuk është imun ndaj këtij kërcënimi”.
Më tej, kërkohej shmangia e lajmeve të rreme, pasi krijojnë panik të panevojshëm.
“Është gjithashtu e një rëndësie kritike edhe lufta ndaj lajmeve të rreme që shkaktojnë alarm të panevojshëm në popullatë. Për shpërthimin epidemik të COVID19, OBSH-ja po shqyrton një sërë faktorësh që lidhen me koronavirusin, mënyrën se si po përhapet dhe kapacitetet e vendeve për t’iu përgjigjur këtij rreziku”, thuhet në njoftim.
OBSH-ja ka arritur në përfundimin se rreziku nga COVID19 në nivelet rajonale dhe globale është “shumë i lartë”, përfshirë shkaqet e mëposhtme: rritjen e numrit të përhapjes së rasteve ndërkombëtare, grupimet (clusters) e mëdha të rasteve të raportuara aktualisht në të paktën 4 vende jashtë Kinës me koronavirus”. z.tosku.
