Kreu i Partisë Demokratike, Lulzim Basha ka vizituar ditën e sotme edhe qytetin e Laçit ku ka marrë edhe ankesat e qytetarëve. Një baore i ka thënë Bashës se i ka ardhur letra të mos futet në banesë pasi është pabanueshme, por që nuk i ka ardhur asnjë ndihmë nga shteti. Një tjetër banore është shprehur se ndjehet e frikësuar dhe po i kalojnë netët nëpër automjete, ndërsa një pjesë e mirë e tyre janë në një moshë të thyer.
Nga ana tjetër, kryedemokrati ka reaguar përmes një statusi në ‘Facebook’ ku shprehet se banorët e Laçit ndjehen të braktisur dhe të pasigurtë, ndërsa apelon se kanë nevojë urgjente për strehim dhe ushqim. “Prej ditësh askush nuk ka shkuar të shohë gjendjen ku ndodhen dhe dëmtimet që kanë në banesa. Gjithashtu ata thonë se nuk u është ofruar asnjë lloj ndihme tjetër në ushqime dhe rroba, gjë që e bën situatën shumë të rëndë për këto familje”, shkruan ndër të tjera Basha
Statusi i plotë:
Banorët e Laçit, ndihen të braktisur dhe të pasigurtë, kanë nevojë urgjente për ushqime dhe strehim. U riktheva sot në Laç për të parë gjendjen. Qindra qytetarë të dëmtuar nga tërmeti më thanë se prej pesë ditësh po i kalojnē netët jashtë, dhe po vuajnë një situatë të rëndë humanitare.
Banorët nuk kanë asnjë qartësi nëse mund të përdorin banesat të cilat duken të dëmtuara rëndë. Shumë prej tyre thanë se nuk ju është dhënë zgjidhje për strehim, megjithëse banesat e tyre janë të pabanueshme tashmë. Prej ditësh askush nuk ka shkuar të shohë gjendjen ku ndodhen dhe dëmtimet që kanë në banesa. Gjithashtu ata thonë se nuk u është ofruar asnjë lloj ndihme tjetër në ushqime dhe rroba, gjë që e bën situatën shumë të rëndë për këto familje. Duhet një reagim i menjëhershëm për ti ardhur në ndihmë këtyre familjeve që perveç traumës se shkatërrimit të gjithçka që kishin, janë dhe pa asnjë ndihmë e përkrahje.
