Kreu i Partisë Demokratike Lulzim Basha ka publikuar një video në Facebook ku hedh akuza ndaj kreut të bashkisë së Durrësit, Vangjush Dako për lidhje me bandën e Avdulajve të Shijakut. Basha thotë se Dako e ka lënë Durrësin në dorën e krimit të organizuar si shpërblim për blerjen e votave për pushtetin e Edi Ramës.
Në video shfaqet një pjesë e deklaratës së Dakos në emisionin “Opinion” në Tv Klan ku thotë se:“asnjë person nuk ka marrë nga Vangjush Dako asgjë kundra ligjit”, por sipas Bashës, restoranti ‘Pista’ në Durrës, në pronësi të grupit të Avdylajve është ndërtuar me lejen e Vangjush Dakos.
“Dosja 339 sapo ka nisur të zbulohet. Vangjush Dako e ka vendin në burg” – shkruan Basha.
