Një aksident është regjistruar pak minuta më parë në dalje të qytetit të Beratit, në Kombinat. Dy mjete, njëri tip Hunday dhe tjetri tip ‘Ford Fokus’ janë përplasur me njëra-tjetrën, duke rrëshqitur disa metra në asfalt.

Mësohet se shkak për këtë aksident është bërë një parakalim i gabuar i mjetit tip Ford Fokus, që jo vetë duke parakaluar gabim por edhe me shpejtësi të madhe, ka goditur nga prapa mjetin tip Hunday, duke e nxjerrë jashtë rruge. Si pasojë e aksidentit, është plagosur lehtë drejtuesi i mjetit tip ‘Ford Fokus’, ndërkohë që dëmet materiale llogariten të shumta, pasi njëri prej mjeteve është shkatërruar plotësisht në pjesën ballore.

Si pasojë e aksidentit, është bllokuar për disa minuta qarkullimi në dalje të qytetit, deri në mbërritjen e policisë, që pasi bëri matjet paraprake, lëvizi mjetet për zhbllokimin e rrugës. Në vendngjarje kanë shkuar forca të shumta të policisë rrugore, që po kryejnë edhe këqyrjen e vendit të aksidentit.