Ish-kryeministri Sali Berisha u shpreh me fjalët më të ndjera dhe sot pas homazheve në nder të ish-kreut të shtetit Bujar Nishani.
Berisha tha se familja e tij, miqtë, të afërmit dhe të gjithë qytetarët shqiptarë kanë humbur një njeri që i shërbeu shoqërisë dhe qëndroi me dinjitet në insituticonin e presidencës.
Ai tha se Nishani ishte jo vetëm një bashkëpunëtor i ngushtë prej dekadash por edhe një mik i çmuar.
Berisha: Isha për të shprehur nderimin tim më të madh, dhimbjen për të ndarë me Rodetën, Ersin dhe Fjonën zinë e kësaj gjëje të madhe që u ka rënë, miqve, të afërmve dhe mbarë qytetarëve shqiptarë të cilët kanë parë te Bujar Nishani një njeri shembullor. Prind i shkëlqyer, bashkëshort fisnik! Shteti shqiptar, një nga shtetarët më dinjitozë në historinë e tij, një nga shërbëtorët më të përkushtuar ndaj shoqërisë.
Nishani në dekada ka qenë një nga bashkëpunëtorët e mi më të ccmuar, më të cilin më lidhi jo vetëm bashkëpunimi por edhe një miqësi e përsosur, një miqësi që nuk njohu asnjëherë rënieje, përkundrazi gjithnjë në forcim.
Kujtimet për Bujar Nishanin janë të shumta dhe ai sot fizikisht nuk është më mes nesh por shpirtërisht ai është përjetësisht i gjallë, në memorien time dhe të gjithë atyre që patën fatin e madh ta njohin si mik.
Ndaj dhe duke ndarë sot zinë me familjen e të afërmit, shpreh ngushëllimet e mia atyre dhe shqiptarëve që humbën sot ish-kreun e shtetit që i dha në detyrë dinjitet të madh institucionit të presidencës. I paharruar dhe i përjetshëm do të mbetet kujtimi i tij!
