Emisioni investigativ “BOOM” në RTV Ora denoncoi mbrëmjen e sotme një rast mashtrimi. Skënder Kalbaj, brenda një dite humbi kursimet e gjithë jetës.
Denoncimi: I dhashë 65 mijë euro pa interes, më tha se do të mi kthente brenda vitit. Kur e pashë që po më shmangej shkuam dhe bëmë noterinë.Si përfundim unë u mashtrova përmes mikut tim që e njihja. Ja kam dhënë nga shkurti i 2007, mundi dhe gjithë jeta ime aty ka shkuar.
Por si ndodhi?
Në vitin 2008, një mik i Skënderit tha se njihte një investitor i cili po ndërtonte pallate dhe hotele në jug të vendit dhe për momentin i duheshin 65 mijë euro. Skënderi pasi takohet me Besnik Feimin, personi i cili e kërkonte këtë shumë, vendos ta ndihmojë. Skënderi vendos ti japë gjithë kursimet e familjes, plot 65mijë euro pa interes, vetëm që Besimit mos t’i bllokohej puna. Nga ana tjetër mori garancinë se për 3 muaj do t’i ktheheshin lekët.
Jo 3 muaj, por kanë kaluar më shumë se 10 vite që lekët nuk iu kthyen, duke rënduar se tepërmi gjendjen shpirtërore dhe morale të Skënderit, i cili i humbi të gjitha lekët. Qytetari e ka ndjekur çështjen edhe në rrugë ligjore, duke e kallëzuar në prokurori përsonin që i mori lekët. Në vitin 2017 u zhvillua seanca gjyqësore, por ka 2 vite që Skender Kalbaj nuk mund të njihet me vendimin e gjykatës.
Gazetarja e “BOOM” shkoi në gjykatë bashkë me qytetarin dhe tërhoqi vendimin. Çështja i ka kaluar Gjykatës së Apelit. Nuk dihet se si do të shkojë çështja, por një gjë është e qartë; Skënderi që u mundua të bënte mirë sot troket në dyert e gjyqësorit për të gjetur të drejtën, ndërsa personi që i mori 65 mijë euro shëtit i lirë.
