Bujtina “Te Xhako” e cila ndodhet në Grabovë të Përmetit është një tjetër sipërmarrje frymëzuese e mbështetur nga AZHBR përmes Programit IPARD II.
Eltoni e nisi këtë investim në tokat e gjyshërve të tij, duke shfrytëzuar peizazhin mbresëlënës pranë lumit Vjosë dhe malit Dhëmbel, për të ndërtuar këtë bujtinë e cila është shëndrruar në një nga destinacionet më tërheqëse turistike për çdo vizitor.
Vizioni i tyre është zhvillimi i turizmit rural, duke ndërthurur akomodimin cilësor në 8 dhoma, mikpritjen, kuzhinën tradicionale përmetare si edhe një sërë aktivitetesh kulturore dhe sportive.
Bujtina“ Te Xhako” është vetëm një nga investimet e mbështetura nga AZHBR por gjithsej janë nënshkruar 49 kontrata, të cilat kanë për qëllim zhvillimin e agroturizmit dhe krijimin e të ardhurave të qëndrueshme në zonat rurale.
Në kuadër të kësaj mase, granti në dispozion është 10.87 milion[ euro, fonde të Bashkimit Europian në bashkëfinancim me Qeverinë Shqiptare
Përmeti është ndër zonat më të vizituara të vendit pasi natyrës së bukur i shtohet dhe mikpritja dhe gatimet tradicionale.
Përmeti përshkohet nga lumi Vjosë, i cili krijon një luginë shumë të bukur dhe rrethohet nga male me një florë dhe faunë të veçantë. Nuk mungojnë parqet me një interes të madh natyror, si Bredhi i Hotovës dhe burime termale me ujë sulfurik në luginën e Langaricës, të cilat formojnë pishina natyrale dhe të përdorshme.
Gjithashtu janë të shumta monumentet me interes të madh historik, ndër të cilat numërohen shumë kisha, manastire të periudhës bizantine, rrënoja arkeologjike etj. Një tjetër aspekt që e bën të famshme këtë luginë janë dhe produktet tipike agroushqimore dhe me një kualitet të lartë të zonës.
