Në bazë të të dhënave zyrtare që vijnë nga Organizata Botërore e Shëndetësisë, numri i viktimave nga coronavirusi ka arritur në 813. Duke e krahasuar me epideminë SARS që u përhap në 2003, humbën jetën 774 persona. Shifrat janë të frikshme, duke dëshmuar se coronavirusi ka tejkaluar SARS-in.
Kreu i OBSH-së, Tedros Adanom tha se nuk mund të garantonte ende nëse virusi ishte vënë nën kontroll, pasi ulja e ritmit të të prekurve është vetëm momental dhe ai mund të rritet sërish.
Vuhani i cili është edhe epiqendra e virusit, njoftoi mbajtjen mbyllur të shkollave të paktën deri në 1 mars. Përhapja e coronavirusit ka shkaktuar panik në të gjithë botën. Ndërsa numri i të vdekurve vazhdon të rritet, 27 vende janë të prekur nga virusi vdekjeprurës. Vetëm në një ditë, në Kinë kanë humbur jetën 86 persona. Mijëra njerëz janë vendosur në karantinë.
