Një 29-vjeçar është arrestuar sot nga policia e Tiranës, për shkak se shantazhonte një vajzë braziliane me videot intime për t’i marrë para.
Gazetarja Kasandra Pali raporton për Gazeta Shqip se pasi janë njohur në rrjetet sociale, braziliania i dërgonte shpesh video intime Eraldo Dervishit.
Të njëjtat burime informojnë se shtetasja braziliane, 19 vjeç, kishte ardhur në Shqipëri për të takuar të riun.
Ky i fundit i ka marrë pasaportën dhe i ka kërkuara para në mënyrë që të mos publikonte videot intime.
“Më jep para që mos të nxjerr videot dhe pastaj do të jap dhe pasaportën,” mësohet t’i ketë thënë Dervishi.
Menjëherë pas kësaj, e reja braziliane ka bërë denoncim në polici.
Njoftimi i Policisë
Finalizohet operacioni policor i koduar “Extortion”, i zhvilluar nga Komisariati i Policisë Nr. 6.
Shantazhonte një shtetase, që t’i jepte shuma parash, për mospublikimin e disa videove, vihet në pranga 29-vjeçari.
Sekuestrohen një aparat celular dhe një pasaportë.
Shërbimet e Komisariatit të Policisë Nr. 6, në vijim të punës për parandalimin dhe goditjen e paligjshmërisë, pas kallëzimit të marrë nga një shtetase 19 vjeçe, nga Brazili, se një shtetas e shantazhonte për dhënie pasurie, që të mos i publikonte një video, në rrjetet sociale, menjëherë kanë organizuar punën për identifikimin dhe kapjen e autorit të dyshuar dhe kanë finalizuar operacionin policor të koduar “Extortion”.
Falë veprimeve profesionale, nga specialistët për Hetimin e Krimeve në Komisariatin e Policisë Nr. 6, brenda pak orësh, është bërë lokalizimi dhe arrestimi në flagrancë i shtetasit:
– E. D., 29 vjeç, banues në Tiranë, për veprën penale “Shtrëngimi me anë të kanosjes ose dhunës për dhënien e pasurisë”.
Gjatë veprimeve hetimore ka rezultuar se shtetasi E. D. i kishte marrë pasaportën 19-vjeçares, të cilën e shantazhonte që t’i jepte shuma të caktuara parash, për mospublikimin e disa videove që ai dispononte.
Materialet i kaluan Prokurorisë, për veprime të mëtejshme procedurale
