Sekretarja e Përgjithshme e Ministrisë së Brendshme Elena Pici, ka reaguar pas njoftimit se ka dhënë dorëheqje.
Në një postim në Facebook, Pici sqaron se ka kryer me përgjegjshmëri dhe integritet detyrën e saj, duke shtuar sde ka patur besimin e kryeministrit Edi Rama dhe të ministrit Bledi Çuçi.
Më tej ajo thotë se dorëheqja ishte një vendim personal dhe nuk përkon me asnjë ngjarje tjetër, siç janë ndërtimet pa leje, sikundër u raportua në medie.
“Pavarësisht se vlerësoj që emërimet apo lirimet e Sekretarëve të Përgjithshëm nuk duhet të përbëjnë lajm, për aq kohë sa ne jemi thjesht shërbyes publik në administratë, në kushtet e një raportimi të pavërtetë që po qarkullon në media, ndiej detyrën të sqaroj për atë pjesë të opinionin publik të interesuar se:
Unë kam pasur privilegjin të kem besimin e vazhdueshëm përgjatë dy viteve të Kryeministrit dhe Ministrit në kryerjen e një detyre të rëndësishme publike, atë të Sekretarit të Përgjithshëm të Ministrisë së Brendshme, detyrë të cilën (përkundrejt gjithë spekulimeve mediatike, në disa raste dashakeqe në momentin e emërim tim), ndiej se e kam kryer me përgjegjshmëri të plotë, me profesionalizëm dhe integritet dhe kurdoherë e mbeshtetur nga ekipi i Ministrisë së Brendshme.
Për këdo që do të besojë faktet dhe jo thashethemet, vendimmarrja për zhvillimin tim të karrierës në sektorë të tjerë është krejtësisht një vendim personal dhe nuk përkon me asnjë ngjarje apo çështje tjetër sikundër është raportuar në disa media. Çdo spekulim dhe insinuatë që ngrihet, mund t’i shërbejë interesave të të tjerëve, por kurrsesi jo të vërtetës!Faleminderit!E.”, shkruan Elena Pici.
