Emisioni investigativ “BOOM” prezantoi këtë të premte një tjetër raste që kërkon ndihmën e menjëhershme. Bëhet fjalë për 42-vjeçarin Shkelzen Behlula nga Tirana, i cili vuan nga një lloj kanceri i rrallë. Jeta e 42 vjeçarit rridhte normalisht deri para dy vitesh kur filloi të ndjente dhimbjet e para në trup. Edhe pse gjendja shëndetësore e tij vinte duke u përkeqësuar nga dita në ditë, mjekët nuk mundën t’i vendosin një diagnozë sëmundjes së Shkelzenit. Të pashpresa, mamaja dhe motra e Shkelzenit vendosën ta dërgojnë në Greqi, aty ku u diagnostikua me një lloj kanceri të rrallë.
Shkelzen Behlula: Në fillim fare më filloi te këmbët, brenda tre muajsh u paralizova. Insistoja se problemi ishte te gjaku, mjekët thoshin te nervat. Pasi bëmë analiza në Greqi doli që ishte te gjaku. Dëshira ime është të marr edhe njëherë këmbët, më duket fundi i botës që në moshë 42-vjeçare të jem në këtë gjendje. Kam bërë jetë aktive. Vetëm një ilaç është 4500 euro. Tani që drita jeshile është ndezur në jetën e 42-vjeçarit pasi një spital në Athinë ka marrë përsipër kurimin e sëmundjes, familja nuk ka mundësi ti mbulojë shpenzimet e spitalit, rreth 10 mijë euro.
Shkelzen Behlula: Deri tani çdo shpenzim e ka përballuar familja ime, tani jemi dorëzuar, nuk kemi më mundësi. Me 25 tetor duhet të shkojmë në Greqi, më duhet një shumë e konsiderueshme për të vazhduar trajtimin.Sipas doktorit grek deri në 95% do të rimarr jetën normale.
Mamaja: Ju lutem të gjithëve nëse kanë mundësi të na ndihmojnë të dalim nga kjo gjendje. Nuk e shoh dot në atë gjendje fëmijën, shumë e vështirë.
