EcoAlbania ka kënaqësinë t’ju ftojë në shfaqjen e dokumentarit “Vjosa e Egër” realizuar nga gazetari Artan Rama. HYRJA E LIRË, Shfaqja e dokumentarit do të organizohet më 17 mars 2022, ora 17:00, tek Pallati i Kulturës, Vlorë. Dokumentari “Vjosa e Egër” është një itinerar i pazakontë përgjatë luginës së lumit të fundit të egër në Evropë, ku ndërthuren magjia e natyrës, shkenca dhe trashëgimia etnokulturore në të njëjtën kohë.
Dokumentari përmbledh përpjekjet e aktivistëve dhe të shkencëtarëve për mbrojtjen e burimeve nga projektet e shfrytëzimit agresiv në favor të investitorëve e në dëm të natyrës dhe të komuniteteve që jetojnë pranë këtyre burimeve. Sot, në kushtet e një transformimi marramendës të teknologjisë, kur habitatet e egra po degradojnë nën peshën e rëndë të kontratave të shumta koncesionare, ujërat e ëmbla të Vjosës rrjedhin ende të lira.
Por për sa kohë do të qëndrojnë të tilla? Për të diskutuar mbi situatën aktuale dhe të ardhmen e lumit Vjosa dhe për t’ju dhënë përgjigje pyetjeve tuaja nga gazetarët realizuas të dokumentarit nga “Elementit të pestë” dhe përfaqësues të EcoAlbania, ju presim!
