Gjykata e Durrësit ka caktuar masën e sigurisë “arrest në burg” me afat 45 ditor për dy personat që dhunuan kamerierin 18-vjeçar në Mal të Robit, Golem.
Njëri nga pronarët e hotelit F.Habilaj dhe shoku i tij E. Dragoti, të arrestuar nga policia e Kavajës akuzohen nga prokuroria per plagosje të rëndë me dashje.
Ndërkaq në orën 12:30 pritet të zhvillohet masa e sigurisë për M.Nelën, xhaxhain e kamerierit, G.Nela, që u kap me një kallashnikov dhe 3 karikatorë në automjet.
Sipas policisë, ai po shkonte të hakmerrej ndaj dhunës së ushtruar mbi nipin i cili u përfshi në konflikt për pagën me vëllezërit Habilaj, bashkëpronarë të hotelit.
Si ndodhi ngjarja:
Një konflikt për pagesën e punës përfundoi me dhunimin e një kamarieri 18-vjeçar dhe rrezikoi të përshkallëzohej në një përplasje me armë zjarri.
Sipas hetimeve paraprake, G.Nela, 18 vjeç, i cili punonte si kamarier në një hotel në Malin e Robit, u dhunua pas një konflikti lidhur me pagesën.
Për ngjarjen janë arrestuar F.Habilaj, 28 vjeç, dhe E.Dragoti, 20 vjeç, ndërsa A.Habilaj, 36 vjeç, është shpallur në kërkim. Personat e dyshuar janë pjesëtarë të familjes së pronarit të hotelit ose persona të afërt me ta.
Pas dhunimit, 18-vjeçari u dërgua në Spitalin e Kavajës për të marrë ndihmë mjekësore.
Situata mori një tjetër kthesë kur xhaxhai i të riut, 47-vjeçari M.Nela, mësoi për ngjarjen dhe, sipas policisë, u nis drejt hotelit i armatosur, me qëllim hakmarrjen.
Policia e ndaloi pranë hotelit dhe gjatë kontrollit në automjet i gjeti në një çantë një kallashnikov, 3 karikatorë dhe 84 fishekë luftarakë. Ai u arrestua për armëmbajtje pa leje.
Ndërkohë, hetimet zbuluan se pas konfliktit vendngjarja ishte pastruar dhe kamerat e sigurisë ishin dëmtuar, pasi DVR-ja ishte hequr dhe kabllot ishin prerë.
Gjykata e Durrësit ka caktuar “arrest në burg” me afat 45 ditë për F.Habilajn dhe E.Dragotin, të dyshuar për plagosjen e rëndë me dashje. Hetimet vijojnë për të zbardhur të gjitha rrethanat dhe rolin e personave të përfshirë.
