Emisioni “Stop” në Tv Klan ka shkuar në sektorin “Rinia” në Durrës për problemin e qytetarit Marash Ndoj, i cili pasi ka marrë legalizimin e shtëpisë, pas disa vitesh ka kërkuar të nxjerrë certifikatën e pronësisë, por i del që në banesën e tij ka mbivendosje shtëpia e komshiut, familja Çunaj. Në realitet këto dy familje i kanë kufijtë e ndarë e nuk kanë asnjë lloj mbivendosjeje.
“Stop” takohet me zonjën Çunaj, e cila u shpreh gjithashtu e shqetësuar që për këtë problem nuk mund të shfrytëzojë pronën e saj. Të dyja familjet janë të gatshme që të japin deklarata noteriale për përcaktimin e kufijve.
“Stop” e adreson problemin në ASHK, ku thanë se po ndërmerren hapat për t’i dhënë zgjidhje rastit, në mënyrë që dokumentet të përkojnë me gjendjen fizike të dy pasurive./Tvklan.al
