Shoferi i drejtorisë së Ujësjellës Kanalizmeve Durrës dhe një qytetar, u arrestuan nga Policia e Durrësit në një operacion të koduar “Porosia e Fundit” për veprat penale të vjedhjes dhe shpërdorimit të detyrës.
Pas hetimeve disa mujore në kuadër të procedimit penal të nisur në vitin 2018, u arrestua A. Gj., 50 vjeç, banues në lagjen Nr.4, Durrës, me detyrë shofer pranë Drejtorisë UKD sh.a..
Sipas Policisë së Durrësit, shoferi i UKD-së, me automjetin e kësaj ndërmarrjeje shpërndante ujë për subjekte dhe persona të interesuar kundrejt pagesës.
Po ashtu u arrestua S. P., 56 vjeç, banues në lagjen Nr.17, Durrës, sepse vidhte ujë në tubacionin e UKD sh.a., Durrës, duke e tregtuar në subjekte dhe persona të interesuar.
Policia thotë se vazhdon puna për dokumentimin e plotë të kësaj veprimtarie kriminale, si dhe për vënien para përgjegjësisë të personave të tjerë të implikuar.
Punonjësi i UKD-së A. Gj., do të hetohet nga Prokuroria e Durrësit për veprat penale “Vjedhja duke shpërdoruar detyrën” dhe “Shpërdorim i detyrës”. Ndërsa S. P., për veprën penale “Vjedhja”.
