Shtetasi me iniciale K.Q, është vendosur në prangat e policisë në mesnatë pasi është kapur në flagrancë për vjedhje. 33-vjeçari banues në Librazhd është nisur për të vjedhur një biznes telefonash, ku është konstatuar se ka thyer xhamin dhe më pas ka tentuar të hyjë.
Qoshku rezulton edhe më i parë i dënuar për veprën penale, vjedhje. Ngjarja ka ndodhur në sheshin “Gjergj Golemi” dhe 33-vjeçari akuzuar dhe përveç vjedhjes dhe për veprën penale “Shkatërrimi i pronës”.
Njoftimi i policisë:
“Tentoi të vidhte në mesnatë, duke thyer xhamin e derës kryesore të një dyqani që tregtonte celularë dhe aparate dixhitale, falë reagimit në kohë të Policisë, kapet në flagrancë dhe vihet në pranga 33-vjeçari. 33-vjeçari i arrestuar, i dënuar më parë për vjedhje. Shërbimet e Komisariatit të Policisë Librazhd, menjëherë pas marrjes së njoftimit se një shtetas kishte thyer xhamin e derës kryesore të një subjekti në sheshin “Gjergj Golemi”, kanë organizuar punën dhe kanë shkuar në këtë adresë, me qëllim zbardhjen e rrethanave të këtij rasti dhe kapjen e autorit.
Si rezultat i veprimeve të shpejta hetimore dhe operacionale, nga specialistët për Hetimin e Krimeve të Komisariatit të Policisë Librazhd u bë identifikimi, kapja dhe arrestimi në flagrancë i shtetasit K. Q., 33 vjeç, banues në Librazhd, për veprat penale “Vjedhja”, mbetur në tentativë dhe “Shkatërrimi i pronës”.
Ky shtetas u kap në flagrancë nga shërbimet e Policisë, pasi kishte thyer xhamin e derës së një subjekti privat, për të vjedhur. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.”
