Një 32-vjeçar është arrestuar nga policia, pasi në dyqanin e tij në zonën e Don Boskos në Tiranë, iu gjetën disa aparate celulare që rezultonin të kontrabanduara.
Sipas policisë, në pranga është vendosur shtetasi B.K. banues në Tiranë. Në dyqanin e tij, policia gjeti 36 aparate celulare që rezultonin të kontrabanduara.
Njoftimi i policisë së Tiranës:
Finalizohet, nga Seksioni për Hetimin e Krimeve Ekonomike dhe Financiare, operacioni policor i koduar “Phones 5”.
Sekuestrohen 36 aparate celulare, vihet në pranga 32-vjeçari që i tregtonte në dyqanin e tij.
Specialistët e Seksionit për Hetimin e Krimeve Ekonomike dhe Financiare, në vijim të kontrolleve të dedikuara, në subjekte të ndryshme tregtare, me qëllim evidentimin dhe goditjen e krimeve ekonomiko-financiare, në kuadër të operacionit policor të koduar “Phones 5”, kanë goditur një rast tjetër të tregtimit të mallrave të kontrabanduara. Si autor i dyshuar i kësaj veprimtarie të kundërligjshme, u arrestua shtetasi:
– B. K., 32 vjeç, banues në Tiranë.
Gjatë kontrollit të ushtruar në dyqanin në pronësi të 32-vjeçarit, në rrugën “Don Bosko”, shërbimet e Policisë gjetën dhe sekuestruan, në cilësinë e provës materiale, 36 aparate celulare të llojeve të ndryshme, të dyshuara të kontrabanduara.
Materialet i kaluan Prokurorisë, për veprime të mëtejshme procedurale.
