Lideri i opozitës ruse, njëherësh kritiku më i zellshëm i Vladimir Putin, Alexei Navalny mund të dërgohet me avion në Berlin për të marrë mjekim më të specializuar. Navalny dyshohet se është helmuar, ndërsa prej orësh ai vijon të jetë i pavetëdijshëm, në gjendje kome.
Por mjeku kryesor në spitalin ku po mjekohet lideri i opozitës thotë se ai nuk është në gjendje për tu zhvendosur. Zëdhënësi i Navalny e quajti vendimin e mjekut “një kërcënim të drejtpërdrejtë për jetën e tij”, shkruan abcnews.al.Ai është në gjendje kome pasi u sëmur gjatë një fluturimi të enjten.
Ekipi i tij dyshon se diçka ishte futur në çajin e tij në një kafene aeroporti. Spitali Charite i Berlinit është gati të trajtojë kritikun e Presidentit të Rusisë Vladimir Putin, tha Jaka Bizilj, drejtori i fondacionit “Cinema For Peace”. Gjermania dhe Franca kanë thënë se duan të ndihmojnë për kurimin e tij.
Kancelarja gjermane Angela Merkel tha “ai mund të marrë nga ne të gjithë ndihmën mjekësore të nevojshme”. Një zëdhënës i Putin kishte thënë të enjten se Kremlini do të ndihmojë në lëvizjen e Navalny jashtë vendit nëse është e nevojshme dhe i uroi atij “shërim të shpejtë”.
