Kryeministri Edi Rama ka zgjedhur që mëngjesin e sotëm t’iu përgjigjet pyetjeve të disa qytetarëve në lidhje me rritjen e çmimit të energjisë. Rama e nisi me një sqarim se pse po rriten çmimet, ndërsa theksoi se ai del para qytetareve dhe i sheh në sy. Madje ai foli dhe për rrogat, duke konfirmuar se nuk do të ketë rritje pagash.
Sipas Ramës, Shqipëria prodhon energji kur ka reshje dhe blen kur ka thatësirë, për këtë arsye është e varur nga tregu ndërkombëtar për çmimin.
“Përshëndetje, e kam ndjekur me shumë vëmendje gjithë reagimin lidhur me krizën energjetike dhe raportin e komenteve tuaja këtu në këtë faqe mbi këtë krizë. Me një numër komentesh përfaqësues do të mundohem të bëj disa sqarime shumë të thjeshta.”, tha Rama.
Pyetja e qytetarit: Ne e prodhojmë në vend energjinë elektrike dhe nuk e blejmë në bursë, kështu që edhe çmimin mund ta vendosni vetë?!
Edi Rama: Jo i dashur Petrit, ne prodhojmë kur kemi reshje të mjaftueshme për mbushjen e hidrocentraleve dhe blejmë kur kemi thatësirë. Shqipëria është e varur nga tregu ndërkombëtar njësoj si vendet e tjera.
