Policia e Bulqizës ka njoftuar se në orët e para të mëngjesit të sotëm, një makinë ka shpërthyer. Sipas njoftimit zyrtar, në makinë ishte vendosur një l ëndë p lasëse, duke shkaktuar vetëm dëme materiale.
“Sindikata e Minatorëve të Bashkuar të Bulqizës” ka reaguar përmes një postimi në rrjetet sociale lidhur me shpërthimin e një sasie eksplozivi poshtë automjetit të Elton Debreshit, minatorit i cili kandidoi si i pavarur në zgjedhjet e 25 Prillit.
Nuk dihen ende motivet dhe arsyet e këtij shpërthimi, që më tepër duket si një kërcënim ndaj ish-kandidatit për deputet.
Postimi i plotë: TRITOLI NUK MUND TA NDALË PËRPJEKJEN TONË Sot në orët e para të mëngjesit ka shpërthyer makina e kryetarit të Sindikatës së Minatorëve të Bashkuar të Bulqizës, Elton Debreshit. Që prej themelimit të sindikatës sonë, ndaj Eltonit dhe shokëve të tjerë ka pasur shpesh përndjekje e kërcënime. Sot arritën te tritoli. Mafiozët, oligarkët dhe pushtetarët që na marrin kromin duan të na marrin edhe jetën nëse themi të vërtetën dhe mbrojmë të drejtat tona. Po ne nuk heshtim. Ne nuk ndalemi.
“Bulqizë/ informacion paraprak. Rreth orës 01.00, datë 27.08.2021, në pjesën e përparme të automjetit të shtetasit E. D., dyshohet se është vendosur dhe ka shpërthyer një sasi e vogël lënde p lasëse dhe si pasojë janë shkaktuar vetëm dëme materiale.
Nga shërbimet e Policisë janë shoqëruar në Komisariat disa persona që dyshohen se mund të kenë dijeni për rrethanat e ngjarjes. Grupi h etimor nën drejtimin e Prokurorisë Dibër po vijon punën për zbardhjen e ngjarjes, dhe kapjen e autorëve”, njofton policia.
