Të tjera detaje mësohen në lidhje me ngjarjen e rëndë të ndodhur këtë të premte në Elbasan, ku tre persona mbetën të plagosur si pasojë e të shtënave me armë. Mësohet se personi që qëlloi me armë tre personat quhet Genti Faqja dhe ka qenë i dënuar më parë për vrasje.
Gjithçka ka nisur në një lokal pranë Pallatit të Sportit në qytet, ku pas një sherri për motive banale, autori ka shkuar në shtëpinë e tij dhe ka marrë armën. Me të ardhur sërish në lokal, plumbat i janë drejtuar shtetasve Fezi Agon, Elton Cërriku dhe Mihal Kocashit.
Si pasojë e të shtënave, Ago dhe Cërriku kanë mbetur të plagosur, ndërsa Kocashi është lënduar nga sende të forta. Dy të plagosurit kanë mbërritur në spital dhe mësohet se plagët i kanë në pjesët e këmbës dhe fytyrës. Policia ka mbërritur në vendngjarje dhe ka nisur hetimet. Gjithashtu janë ngritur postoblloqe për të arrestuar autorin, i cili është identifikuar.
