Një lajm i mirëpritur vjen për shqiptarët nga Amerika pasi Eliot Engel, është zgjedhur kryetar i Komitetit për Marrëdhëniet me Jashtë në Kongresin Amerikan.

Ky është veçanërisht një lajm i mirë për Kosovën, pasi vjen në një kohë kur vetëm pak ditë më parë presidenti i SHBA-së, Donald Trump i dërgoi një letër Hashim Thaçit ku i kërkonte vijimin e dialogut të Kosovës me Serbinë dhe arritjen e një marrëveshje përfundimtare midis tyre e cila do të nënshkruhej në prani të tij në Shtëpinë e Bardhë.

Emërimi i Engelit në këtë pozicion po shihet nga analistët por jo vetëm, si sinjal i interesimit të Amerikës për Kosovën.

Ndërkohë, në mediat kosovare po qarkullon edhe një letër e pretenduar të jetë dërguar nga presidenti Macron në adresë të homologut të tij serb, ku kërkon që Franca të përfshihet në dialogun midis Prishtinës dhe Beogradit për një zgjidhje finale të problemeve midis dy vendeve ballkanike.