Një prokuror është arrestuar nga autoritetet policore këtë të mërkurë. Burime paraprake bëjnë të ditur se bëhet fjalë për prokurorin nga Kavaja, Edmond Karriqi, i cili aktualisht e ushtron detyrën në Prokurorinë e Kukësit.
Mësohet se pas arrestimit, policia ka kontrolluar edhe ambientet e banesës së prokurorit Karriqi. Në pranga ka rënë edhe shoferi i tij.
Edmond Karriqi është prokurori i cili kishte në ngarkim çështjen ndaj këngëtares Fjolla Morina, e cila aktualisht vijon të jetë në arrati. Ai u komandua në krye të prokurorisë së Kukësit në Mars të këtij viti.
Arrestimi i tij është bërë me urdhër të Prokurorisë së Posaçme, për akuzën e korrupsionit.
Sipas burimeve nga prokuroria është arrestuar edhe një zyrtarë në Prokurorinë e Kavajës. Bëhet fjalë për Isuf Gega, me detyrë sekretar në këtë prokurori. Arrestimet kanë ardhur me urdhër nga SPAK, ndërsa dyshohet për një rast korrupsioni por nuk dihet qartësisht se për çfarë bëhet fjalë.
Edmond Karriqi është Drejtuesi i Komanduar nga KLP në krye të prokurorisë së Kukësit, ndërsa emërimin e tij, e ka si prokuror në detyrë në prokurorinë e Lushnjës. Tre vite më parë Karriqi ka shërbyer si prokuror edhe në Kavajë.
