Një 23-vjeçar shqiptar, Argjend Canaku është dënuar me 22 muaj burg në Britaninë e Madhe pasi sulmoi një grup personash me një shkop bejsbolli dhe me thikë, teksa hyri në një dyqan në Oksford.
Mediat britanike, të cilat kanë publikuar dhe pamjet nga vendngjarja shkruajnë se arsyeja që i riu shqiptar po ndiqte turmën është se aty ndodhej një person që e ka sulmuar më parë 23-vjeçarin dhe mesa duket Canaku donte të ‘hakmerrej’.
Avokatja e tij, Samantha Giffin tregoi para gjykatës se Canaku ka pasur një fëmijëri të vështirë dhe me trauma në vendlindje, Shqipëri, pasi babai i tij polic ishte vrarë.
Ai kishte shkuar në Britaninë e Madhe dhe kishte kërkuar azil. Për një periudhë kohe ka qëndruar për pak kohë me një burrë të moshuar përpara se të strehohej nga shërbimet sociale.
Sipas mediave britanike, 23-vjeçari ka qenë disa herë i shoqëruar për drogë dhe dhunë, por nuk është dënuar.
