Shtëpia e bardhë, e izoluar, dhe e ndërtuar në sipërfaqen e një kodre me pamje nga Oqeani Atlanik, është cilësuar si shtëpia më e veçuar në botë. E ndërtuar mbi ishullin e largët të Ellioei, në arkipelagun e Vestmannaejarit, Islandë, thuhet se Qeveria e Islandës ia kishte dhuruar shtëpinë këngëtares islandeze me famë botërore, Bjork. Mirëpo, thuhet se kjo marrëveshje nuk është e vërtetë, pasi që disa thonë se është ndërtuar nga një miliarder anonym, si strehë në rast se ndodh fundi i botës.
Ndërsa, thashetheme të tjera ishin përhapur, gjoja mund të jetë një fetar i izoluar nga shoqëria, si eremit. Disa shkojnë deri aty sa thonë se shtëpia mund të mos ekzistojë fare, por është montazh. Fatkeqësisht, asnjë nga këto teori të bukura nuk është e vërtetë pasi që ishulli ka qenë i banuar para shumë kohësh nga një grup i vogël familjesh, në vitet 1930, por tani është krejtësisht i pabanuar. Shtëpia e bardhë u ndërtua vetëm në vitet 1950, nga një grup gjuetarësh, të cilët shkonin atje vetëm për të gjuajtur zogjtë e veçantë, dhe donin diçka si strehë.
Edhe pse duket si shtëpi ideale për pushime larg qytetërimit, aty nuk ka as energji elektrike dhe as tubacione uji, por ka një sauna islandeze, që furnizohet me ujë nga një sistem që mbushet nga shiu. Edhe pse për njerëzit nuk është vend i mirë për të jetuar, ajo shtëpi është ideale për zogjtë.
Specie të ndryshme kanë ndërtuar me dhjetëra fole në shtëpi dhe në ishull. Për këtë arsye, tani është rezervë natyrore e mbrojtur nga shteti, dhe mund të vizitohet vetëm me grupe të organizuara turistësh, me udhëtime brenda ditës.
