Një studim i fundit i FAO, tregon se rreth tre të katërtat e fermerëve shqiptarë gjenerojnë të ardhura shumë të ulëta nga bujqësia, shumë poshtë nivelit ekonomikisht të qëndrueshëm.
World Food Organization thotë se vetëm 25% e fermave në vend gjenerojnë më shumë se 5,500€ në vit nga aktivitetet bujqësore. Më shumë se një e katërta gjenerojnë më pak se 750 € në vit, ndërsa rreth gjysma gjenerojnë një mesatare prej 1,700€ në vit, ose rreth 500€ për person në moshë pune.
Të dhënat tregojnë se ka rreth 350 mijë ferma në Shqipëri dhe rreth 160 mijë janë më të vogla se 1 hektar. 142,084 janë deri në 2 hektarë dhe vetëm 49 mijë janë më shumë se 2 hektarë. Në mënyrë që një fermë të sigurojë të ardhura për pagën minimale të dy personave dhe disa teprica për investime, duhet të gjenerojë 5000 EURO në vit.
FAO tha se një fermë prej 1 hektarësh mund të prodhojë këto të ardhura nëse produkti zgjidhet me kujdes dhe ka treg të siguruar për shitje. Bujqësia është sektori me pjesëmarrjen më të lartë në ekonomi dhe punësim, ndërsa produktet bujqësore plotësojnë vetëm 50% të kërkesës së brendshme. Shqipëria u rendit e 36-ta në botë për përqindjen e lartë që bujqësia zë në ekonomi, krahas vendeve afrikane.
