Qyteti i Fierit vijon të mbetet një ndër vatrat me numrin më të lartë të rasteve të reja me Covid-19 . Vetëm ditën e sotme janë konfirmuar 7 raste të reja në këtë qytet dhe 1 rast në Patos. Infektimi I tyre lidhet me pjesëmarrjen në një ceremoni mortore në fshatin Cakran.
Kujtojmë se dy ditë më parë u konfirmuan 4 raste pozitive në Fier, pjestarë të së njëjtës familje nga Cakrani por që jetojnë në lagjen 29 nëntori të Fierit. Ndaj rastet e sotme janë të gjithë të afërm të këtyre kontakteve, ku të gjithë kanë qënë në një ceremoni mortore në Cakran. ISHP vijon gjurmimin e rasteve të tjera që janë pjesë e zinxhirit të kontaktit me qëllim identifikimin dhe izolimin e tyre.
Theksojmë se gjatë 24 orëve të fundit në vendin tone kanë humbur betejën me Covidin 4 qytetarë si dhe janë kryer gjithësej 500 testime, ku 124 persona janë konfirmuar të prekur nga virusi Covid 19. Shpërndarja gjeografike e rasteve pozitive ditore është si vijon: 33 raste në Tiranë, 19 në Elbasan, 9 në Mirditë, 8 në Lushnje, nga 7 raste Fier, Krujë, 6 në Korçë, nga 4 raste në Shkodër, Durrës, Vlorë, Divjakë, 3 në Tropojë, nga 2 raste në Kurbin, Lezhë, Pukë, nga 1 rast në Kavajë, Kamëz, Pogradec, Tepelenë, Fushë-Arrëz, Dibër, Malësi e Madhe, Vorë, Maliq, Patos. Gjatë 24 orëve të fundit janë shëruar 41 qytetarë, duke e çuar numrin e të shëruarve në 3268, që nga fillimi i epidemisë.
