20 banesa që ndodhen pranë shtratit të lumit Vjosë në fshatin Ferras të Fierit janë përmbytur këtë mëngjes. Reshjet e dendura të shiut kanë shkaktuar daljen e lumit nga shtrati, ndërsa në terren po punohet me eskavatorë, për të hapur kanalet kulluese. Banorët thonë se kjo është situatë e pazakontë, ndërkohë që në katër vitet e fundit nuk kanë pasur probleme.
Prefekti i Fierit, Lefter Shehaj thotë se në pjesën tjetër të qytetin situata është nën kontroll, pasi po bie intensiteti i reshjeve të shiut. Në Fier, ka dhe probleme me energjinë elektrike në disa fshatra. Raportohet se nënstacioni i Poçemit ka ndalur punën që nga ora 01:30 e mëngjesit. Rreth 3700 abonentë janë aktualisht pa drita, në Hekal , Fratar, Selitë, Kutë.
