Finiq/ I vodhën 6800 eurot e kursyera për operacionin, e moshuara gjen banesën të shkatërruar: Autorët i marrin edhe bizhuteritë
Një e moshuar në fshatin Finiq ka rënë pre e një grabitjeje në banesën e saj, ku persona ende të paidentifikuar i kanë marrë 6800 euro, të cilat i kishte kursyer për një ndërhyrje kirurgjikale, si dhe bizhuteri e sende të tjera me vlerë.
Ngjarja ka ndodhur mbrëmjen e 31 tetorit, rreth orës 18:00–18:30, në kohën kur e moshuara, Eleni Anastasi, kishte shkuar për vizitë te të afërmit që jetojnë pranë banesës së saj.
Kur është kthyer, ajo ka gjetur dyert e shqyera dhe shtëpinë të përmbysur. Autorët kishin kontrolluar ambientet e banesës dhe kishin marrë paratë dhe sendet me vlerë.
Mes tyre ishte edhe shuma prej 6800 eurosh, kursimet që e moshuara i kishte mbledhur për të kryer një operacion shëndetësor.
Pas konstatimit të vjedhjes, ajo ka njoftuar Policinë, e cila ka mbërritur në vendngjarje.
Deri më tani, nuk raportohet për persona të arrestuar, ndërsa autorët mbeten të paidentifikuar.
