U tmerruam nga zhurma”. Këto janë fjalët e një prej banorëve të pallatit ku fshihej i shumërkërkuari Nuredin Dumani, të cilët janë bërë dëshmitar ditën e djeshme të një arrestimi të bujshëm nga policia në Fier.
Duke folur sot për mediat, fqinjët kanë deklaruar se banesën me qira Nuredin Dumani e kishte marrë para një jave.
“Tmerr, tmerr, tmerr. Me sende të forta po i binin dyerve dhe te komshia e atje ku ka ndodhur ngjarja. Ata jetonin në katin e katërt, në katin tre jetoj unë. Vetëm zhurmë dëgjuam që i binin me mjete të forta derës”, tha një banore e pallatit.
Mësohet se Dumani jetonte me një vajzë me shtetësi të huaj. Në katin e fundit të pallatit në Fier, Dumani jetonte prej disa ditësh, teksa ruhej nga 40-vjeçari Henrik Hoxhaj, i cili gjithashtu u arrestua nga policia dje me një pistoletë në brez, në oborrin e pallatit.
Një banore thotë se pak ditë më parë i kishte shkuar Dumanit tek banesa dhe i kishte kërkuar që të mos bënin zhurmë.
“Unë banoj në kat të tretë, ngjarja ka ndodhur në kat të katërt. Vetëm dëgjoja mbrëmë policët që i binin derës me mjete të forta për të hapur derën. Tmerr, u tmerruam. Ata rrinë me qira në fakt. U trokita para 3 ditëve, mos më bëni zhurmë u thashë se jam me tension nuk duroj dot. Na fal, na thanë. Ai që doli ishte rreth 45 vjeç. Pastaj më erdhi për së dyti e më trokiti mua. Unë thashë po ky pse më trokiti prapë? Tha, dëgjo nuk jam unë që bëj zhurmë, është ai lart tha. Epo mirë na fal i thashë unë, që të bezdisa”, tregon një banore e këtij pallati.
Nuredin Dumani ishte një nga më të kërkuarit e policisë, pasi konsiderohet si i përfshirë në shumë ngjarje kriminale dhe vrasje të ndodhur vitet e fundit. Ai konsiderohet edhe si rival i Talo Çelës, një tjetër i shumëkërkuar nga policia shqiptare, i cili vijon të jetë ende në arrati.
