Personi që shihni në foto është Iliaz Cali, 37-vjeçari që iu bë atentat mbrëmjen e të dielës në rrugën dytësore Tiranë-Durrës. Raportohet se Cali ishte duke udhëtuar i vetëm, kur persona të armatosur hapën zjarr drejt makinës së tij nga një tjetër mjet në lëvizje.
Trupi i pajetë i të riut është gjetur në mes të rrugës dhe paraprakisht, policia ka dyshuar se ai kishte pësuar aksident. Ishin shenjat e plumbave që janë evidentuar në mjetin “Land Rover” të viktimës dhe gëzhojat e shpërndara në tokë ato që kanë shtuar dyshimet e policisë se ndaj 37-vjeçarit ishte bërë atentat.
Në xhamin e parë të makinës me të cilën ai po udhëtonte janë gjetur 4 plumbave, ndërkohë ka edhe shumë të tjera në pjesën e djathtë.
Cali njihej si pronar i një firme kamionësh dhe ishte i njohur për policinë. Mësohet se në 2016, kur policia po ushtronte kontrolle në banesat pranë Rinasit, për paratë e vjedhura në aeroport, ka gjetur qindra rrënjë kanabis, që dyshoheshin se ishin në pronësi të tij. Asokohe u arrestua nëna e viktimës, Xhemile Cali, ndërsa Iliazi u shpall në kërkim dhe u arrestua pak më vonë.
