Qytetarët e Beratit dhe bizneset janë solidarizuar për familjet e prekura në nevojë nga tërmeti i së martës. Kryetari i bashkisë Berat, Ervin Demo shprehu sot mirënjohjen për të gjithë qytetarët, por edhe për bizneset për mobilizimin e jashtëzakonshëm. “I jashtëzakonshëm reagimi i menjëhershëm i gjithë qytetit. Qytetarë e biznese i janë bashkuar nismës së bashkisë për mbledhjen e ndihmave humanitare, për t’i ardhur në ndihmë atyre që sot janë në këtë vështirësi. Intensiteti i dhurimeve është emocionues. Faleminderit nga zemra secilit prej jush”, shprehet Demo.
Kryetari Demo shprehet se do vijojmë të mirëpresim çdo dhurim në sheshin qendror të qytetit “Teodor Muzaka” dhe se së bashku do kalojmë të gjitha sfidat që natyra po na vendos. “Kujtojmë për të gjithë që ne vijojmë mirëpresim çdo dhurim, në sheshin qendror ”Teodor Muzaka”, dhe në pikat e marketeve të qytetit. Bashkë do t’i kalojmë të gjitha sfidat që natyra po na vendos përpara”, tha Demo. /a.a/ /a.g/
