Përfundoi projekti për restaurimin e pesë ikonave të amvonës së Katedrales “Fjetja e Shën Mërisë” në Muzeun Onufri.
Pas përfundimit të analizave dhe mbrojtjes së projektit, puna për restaurimin e tyre filloi në fund të muajit gusht dhe përfundoi në fund të muajit tetor.
Ajo u zhvillua në disa faza të ndryshme, për secilën ikonë si, pastrimi dhe dezinfektimi i panosë së ikonës si dhe injektimi i antimolit nëpër galeritë aktuale, konsolidimi i panosë së drurit. Më pas u vazhdua me ndërhyrjen në pjesën e përparme. U procedua me injektimin e antimolit nëpër galeritë e vjetra me shiringë për të paraprirë aktivitete të reja të mikroorganizmave si dhe konsolidimin e galerive te mëdha dhe mbushja e tyre.
Puna vazhdoi me çlirimin e pelikulës piktorike nga verniku i degraduar, heqjen e papastërtive të qëndrueshme si dhe konsolidimin e pelikules piktorike dhe shtresave përgatitore. Me pas u procedua me një retushim estetik të veprës duke respektuar gjithmonë patinën e kohës për të mos krijuar një falls historik. Në përfundim u bë rivernikimi i veprës.
Rezultati i arritur është vërtet mbresëlënës duke nxjerrë në dukje freskine e ngjyrave të autorit si dhe siluetën e personazheve të paraqitur në pesë ikonat e restauruara të cilat i përkasin amvonës së Katedrales së “Shën Marisë,” sot Muzeu Onufri dhe atribuar gjeneratës së fundit të piktorëve me mbiemër Katro (Çetiri) nga Grabova, rreth vitit 1850./atsh
