Prefekti i qarkut Gjirokastër, Astrit Aliaj ndoqi sot nga afër rifillimin e procesit të shpërndarjes së kartave të identitetit nga sportelet e shërbimit Aleat, të vendosura në ambientet e Agjencisë së Ofrimit të Shërbimeve Publike të Integruara Dega Gjirokastër. Në zbatim të udhëzimeve të Ministrisë së Brendshme, tërheqja e kartave të identitetit mund të kryhet vetëm pasi qytetarët të njoftohen nga zyra përkatëse, ndërsa prej javës së ardhshme do të fillojnë edhe aplikimet e reja për kartat e identitetit dhe pasaporta biometrike.

Sipas Drejtoreshës së ADISA-s Gjirokastër, Marseda Xarba, fillimisht do të përcaktohet një orar paraqitje për çdo person, ndërsa i gjithë procesi do të shoqërohet me masat e reja të sigurisë. Prefekti i qarkut në një komunikim me medien ftoi qytetarët e qarkut Gjirokastër që të bashkëpunojnë në këtë proces, duke respektuar me rigorozitet të lartë protokollet përkatëse.