Në një kohë që ka nisur akomodimin e banorëve të prekur nga tërmeti në hotele, Bashkia Durrës vijon përkujdesjen ndaj qytetarëve që janë vendosur përkohësisht në çadrat e ngritura në stadiumin “Niko Dovana”. Kryetarja e Bashkisë Durrës, Valbona Sako bën të ditur se “grupet tona po shpërndajnë pakot e ndihmës me çadra, batanije, dyshekë dhe ushqime për të gjitha ato familje të cilat kanë nevojë”.
Saku u ka shprehur mirënjohje qindra kolegëve, vullnetarëve, efektivëve, mjekëve që në këto orë të vështira ku mund të ishin pranë familjeve të tyre, me përkushtim dhe sakrifica po bëjnë gjithçka për të na ndihmuar. “Një falënderim edhe për partnerët tanë ndërkombëtarë që na janë gjendur në kohë rekord duke sjellë grupe të specializuara në kërkim-shpëtim dhe stafe mjekësore për t’i ardhur në ndihmë qytetarëve në këtë sfidë të paprovuar më pare”, thekson Sako.
