“Të markojmë malet e Kukësit”, është kjo nisma e disa të rinjve kuksianë të apasionuar pas Hiking, një ndër sportet më të preferuara për të gjithë grupmoshat në Shqipëri. Ermal Hallaçi, guidë turistike në qarkun e Kukësit tha për ATSH-në se “kjo është nisma ime personale vullnetare duke qenë se ushtroj sportin e Hiking dhe duke parë të gjithë vendet që kam vizituar në rrethin e Kukësit kam vënë re që ka mungesë të markimeve të shtigjeve drejt majave”. “Punën e nisëm me shënjimin e shtegut në fshatrat Mustafë Bicaj – Tërshenë, ndërsa ditët në vijim do të shënjojmë shtigje të tjera. Duke qenë se edhe pandemia po kalon dhe tani është koha e fluksit të turistëve bashkë me disa të rinj të apasionuar pas Hiking menduam të markojmë këto shtigje”, – tha Hallaçi.
Sipas tij, markimi i shtigjeve ndihmon çdo turist që ka zgjedhur të udhëtojë në atë shteg për tek destinacioni i duhur. Ai shprehet se “Kukësin vitin e kaluar e kanë vizituar një numër i madh grupesh turistike, ku Parku Natyror Korab-Koritnik është një ndër parqet më të frekuentuara në këtë zonë”. Parku Korab-Koritnik ka 25 monumente natyrore (kategoria e tretë e zonave të mbrojtura në Shqipëri). Maja e malit të Korabit, më i larti në Shqipëri, ka një bukuri të rrallë. Përveç tij ka edhe kreshta të tjera vargmali, me formacione gëlqerore dhe gipsi, mbuluar me bimë barishtore dhe kullota alpine, me lloje të ndryshme lulesh plot aromë gjatë pranverës dhe verës. Burimet e ftohta të ujit, liqenet natyrore, majat e maleve mbuluar me borë, ofrojnë mundësi të mëdha për të shijuar çdo detaj të turizmit malor, dimër dhe verë.
