Asnjë person i dyshuar me koronavirus nuk ka hyrë në Shqipëri përgjatë orëve të fundit. Ose të paktën nuk e kanë zbuluar stafet mjekësore të vendosura në të gjitha pikat kufitare të vendit ku ka nisur të zbatohet plani i përforcuar kundër përhapjes së koronavirusit.
Udhëtarët nga deti kontrollohen për gjendjen shëndetësore në tragete para se të lejohen të zbresin në portet shqiptare, si pjesë e masave të forcuara kundër përhapjes së koronavirusit.
“Na kontrolluan.”
Këtë të hënë në portin e Durrësit hynë rreth 500 persona, nga të cilët askush nuk rezultoi i dyshuar.
“As panik, asgjë. Gjithësecili në punë të vet”.
Shumica e pasagjerëvë vinin nga qytete italiane ku thonë se nuk kishte panik edhe pse bilanci i virusit ka shkaktuar një situatë frike.
“Këtu kemi frikë nga tërmeti, atje nga virusi”.
Fluksi konsiderohet normal nga autoritetet e portit, të cilët theksojnë se kanë marrë masat për çdo situatë që mund të paraqitet.
“Nuk ka fluks të personave që hyjnë në vendin tonë”.
Plani i forcimit të masave që përfshin edhe dyfishimin e personelit shëndetësor ka nisur të zbatohet në të gjitha pikat kufitare tokësore nga veriu në jug.
Nje grua e kthyer nga Milano, një prej qyteteve të prekura iu nenshtrua kontrollit në Muriqan e nxori të pastër.
“Vi nga Milano, nuk kemi pasur kontrolle të tjera. Kemi qenë shumë mirë.”
Kontrollet janë forcuar në të tre pikat kufitare me Greqinë në qarkun e Korçës.
Udhëtarëve u matet temperatura dhe pyeten sipas procedurës të caktuar për vendet që kanë udhëtuar së fundmi.
Në Kapshticë, Qafë Thanë e Tushemisht, asnjë nuk ka rezultuar i dyshuar.
“Ka qenë vetëm një kineze që jeton në Gjermani, nuk ka pasur asnjë shenjë.”
Asnjë person i dyshuar nuk ka hyrë në Shqipëri edhe nga Pika kufitare e Qafë Botës në Sarandë.
Ndonëse nuk kanë fluks të lartë të lëvizjeje, ekipet mjekësore janë dyfishuar edhe në pikat e vogla kufitare me Kosovën.
