Anëtarja e Komitetit Teknik të Ekspertëve Silva Bino paralajmëron mundësinë e vendosjes së masave të reja shtrënguese ndaj koronavirusit në vend pas një jave të rëndë që shënoi 70 viktima dhe 4067 infektime të reja. Një ditë pasi Komiteti Teknik vendosi të mos ndryshonte masat kufizuese, Bino tha nga Kukësi se fundjava do të jetë vendimtare, dhe se të hënën pritet të ketë një vendim për masat e reja.

“Situata po ndiqet, është shqetësuese dhe natyrisht që do të merren masat përkatëse dhe në fund të javës e të hënën do ta shikojmë se si po ecën situata gradualisht, do merren masat përkatëse.” Në mbledhjen e fundit të Komitetet Teknik i Ekspertëve situata u raportua e qetë, por u vendos që vlerësimi i masave shtesë të bëhet jo më për harkun kohor të dy javëve por më shpesh për shkak të dinamikës së situatës.

Shifrat e të infektuarve në 24 orë qëndrojnë mbi 1000, por për Binon dhe ekspertë të tjerë të Shëndetësisë tregojnë një efekt pozitiv nga kufizimi i lëvizjes prej orës 20:00, duke lënë të hapur mundësinë për një kufizim të ri. “Vetëm një zvogël i vogël i orës solli një zvogëlim të numrave. Është një zvogëlim shumë i vogël, por situata po ndiqet.”

Përveç masave shtrënguese, do të ketë edhe skenarë të tjerë mbështetës për përballimin e situatës, sic është hapja e spitaleve të tjera rajonale. Ndërkohë nga Spitali infektiv pasditen e së enjtes po kryhej transferimi I të sëmurëve në pavijone të tjera covid. Në disa raste, për të përshpejtuar procesin në një autoambulancë transportoheshin 2 pacientë.