Artur Kalaja do të jetë anëtari i ri i Gjykatës së Lartë. Emri i tij është dekretuar sot nga Presidenti Ilir Meta dhe vendimi hyn në fuqi menjëherë. Tashmë, institucioni më i lartë i drejtësisë në Shqipëri do të ketë 9 anëtarë. Vendimi për emërimin e gjyqtarit Artur Kalja në Gjykatën e Lartë, i është përcjell Presidencës nga Këshilli i Lartë Gjyqësor.
DEKRET PËR EMËRIMIN E GJYQTARIT TË GJYKATËS SË LARTË
Në mbështetje të nenit 93 dhe nenit 136 të Kushtetutës, nenit 48, pikat 11 dhe 13, të ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, i ndryshuar, pas administrimit pranë Institucionit të Presidentit të Republikës në datë 19.07.2021, të propozimit të arsyetuar të përcjellë me shkresën me nr. 3390/2 prot., datë 19.07.2021 dhe Vendimit nr. 311, datë 16.07.2021, të Këshillit të Lartë Gjyqësor “Për propozimin për emërim në Gjykatën e Lartë, të kandidatit z. Artur Kalaja”, shoqëruar me praktikën dokumentare të ngritjes në detyrë/emërimit në Gjykatën e Lartë, nga radhët e gjyqtarëve, për pozicionin e lirë në fushën e të drejtës civile, të shpallur për kandidim me vendimin nr. 87, datë 26.02.2020, të Këshillit të Lartë Gjyqësor, vendosa të:
D E K R E T O J: Neni 1 Zoti Artur Kalaja emërohet gjyqtar i Gjykatës së Lartë.
Neni 2 Ky dekret hyn në fuqi menjëherë.
Nr. Dekretit 13173 Tiranë, më 26.07.2021