Një konflikt i ndodhur mbrëmjen e 11 korrikut në lagjen “Uji i Ftohtë” të Vlorës ka përfunduar me një person të plagosur dhe një tjetër të arrestuar nga Policia.
Falë ndërhyrjes së shpejtë të shërbimeve të Komisariatit të Policisë Vlorë dhe strukturave të DVP Vlorë, u bë i mundur neutralizimi i autorit të ngjarjes, i cili u kap në flagrancë.
Në pranga ra shtetasi Besnik Gjondeda, 64 vjeç, banues në lagjen ku ndodhi ngjarja, i cili akuzohet për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.
Sipas policisë, ngjarja ndodhi rreth orës 23:30, në ambientet e një lokali pranë vendit të quajtur “Rrapi”. Gjatë një konflikti për motive të dobëta, Gjondeda dyshohet se ka goditur me mjet prerës në pjesën anësore të kraharorit shtetasin Gazmend Vreshtazi 56 vjeç. Ky i fundit ndodhet nën kujdesin e mjekëve në Spitalin Rajonal të Vlorës dhe fatmirësisht është jashtë rrezikut për jetën.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për vijimin e veprimeve ligjore.
