Një skenë e pazakontë, e denjë për filmat hollivudian është regjistruar në Greqi. Dy persona për të shpëtuar nga flakët kanë kaluar përmes zjarrit. Mediat greke kanë publikuar momentin kur një makinë bashkë me dy persona brenda ka kaluar përmes zjarrit. Sipas mediave video është regjistruar nga brenda makinës në zonën e Kastraki në Arkadia.
Greqia prej ditësh vijon që të përballet me sfidën dhe me rrezikun e përhapjes së flakëve të zjarrit.
Mediat greke bëjnë me dije se së fundmi janë riaktivizuar vatrat e zjarrit në Evinë Veriore, ku më të rrezikuara janë Ellinika, Agriovotano, Asmini, Galatsona dhe Avgaria.
Ndër të tjera në media thuhet se për shkak të përhapjes së flakëve të zjarrit rrezikohen disa fshatra. Ndërkohë zjarrëfikës ndërkombëtarë dhe vullnetarë të shumtë po punojnë për shuarjen e flakëve.
