Greqia ka vendosur ndalimin e përkohshëm të hyrjes në vend të të gjithë shtetasve të vendeve të treta nga cilado pikë hyrëse në Greqi dhe në çfarëdo mënyre ose mjet, përfshirë nga ajri, deti, hekurudha dhe rruga.
Ambasada e Republikës së Shqipërisë në Greqi informoi sot shtetasit shqiptarë në lidhje me vendimet që kanë marrë autoritetet greke në kuadër të masave për parandalimin e përhapjes së koronavirusit.
“Në kuadër të masave për parandalimin e përhapjes së koronavirusit, autoritetet greke kanë njoftuar ndalimin e përkohshëm të hyrjes në vend të të gjithë shtetasve të vendeve të treta nga cilado pikë hyrëse në Greqi dhe në çfarëdo mënyre ose mjet, përfshirë nga ajri, deti, hekurudha dhe rruga”, thuhet në njoftimin e Ambasadës shqiptare në Greqi.
“Ndalimi i paragrafit 1 të këtij neni nuk zbatohet për shtetasit e shteteve anëtare të Bashkimit Europian dhe të Marrëveshjes së Shengenit, përfshirë bashkëshortët ose personat me të cilët kanë marrëveshje bashkëjetese ose të fëmijëve të tyre të mitur”, thuhet në njoftim.
“Kufizimi në fjalë do të zbatohet për periudhën ndërmjet 18.3.2020 ora 06:00 deri më 18.4.2020 ora 06:00”, përfundon njoftimi.
